नेपाली काँग्रेस रामेछापले महासमिति निर्वाचनको मिति तोकियो ।

रामेछाप । नेपाली काँग्रेस रामेछापले महासमितिको निर्वाचन मिति तय गरेको छ । पार्टीको आन्तरिक विवादमा कारण अनिश्चित कालको लागि स्थगित गरिएको काँग्रेस महासमिति सदस्यको निर्वाचन फागुन १ गतेका लागि तोकिएको छ । जिल्लाबाट महासमिति सदस्यको नामावली केन्द्रमा नपठाए केन्द्रीय निर्वाचन समितिले आगामी फागुन ७ देखि १० गतेसम्म हुने महासमितिको बैठकमा रामेछापबाट सहभागी हुन नपाउने पत्र पठाएपछि निर्वाचनको मिति तोकेको हो ।
फागुन १ गते बिहान ८ बजे देखि साँझ ५ बजे सम्म जिल्ला समन्वय समितिको प्राङ्गणमा मतदानको समय तोकिएको निर्वाचन अधिकृत कुशप्रसाद दाहालले बताए । दाहालका अनुसार – यस अगाडि नै दर्ता भइसकेको उम्मेदवारले उम्मेदवारी फिर्ता लिन चाहेमा माघ २४ गते साँझ ५ बजेसम्म पार्टी कार्यालय बिपी स्मृति भवन मन्थलीमा सम्पर्क गर्न सकिने छ ।
निर्वाचन तालिका अनुसार – माघ २७ गते साँझ ६ बजे पार्टी कार्यालयमा उम्मेदवारको अन्तिम नामावली प्रकाशन गरिने र २८ गते आइतबार बिहान ८ बजे सोही ठाउँमा वर्णानुक्रम अनुसार नमुना मतपत्र टाँसिनेछ। समितिले मतगणना स्थल भने नेपाल शिक्षक संघको भवनमा तोकेको छ ।
नेपाली काँग्रेस रामेछापका अनुसार मतदानमा एक हजार ४ सय बढी क्षेत्रीय प्रतिनिधिहरूले भाग लिनेछन् ।