‘देशमा अबको विकल्प कांग्रेस मात्रै हो ’ : प्रवक्ता रुवाली

रामेछाप । नेपाली कांग्रेस बागमती प्रदेश कार्यसमितिका प्रवक्ता तिलक रुवालीले आगामी फागुन २१ गते हुने प्रतिनिधि सभाको निर्वाचनलाई केवल सामान्य मतदानको प्रक्रिया मात्र नभई देशलाई अस्थिरता र वैचारिक विचलनबाट मुक्त गराउने महासंग्रामको संज्ञा दिएका छन् । निर्वाचनको पूर्वसन्ध्यामा रामेछापको सदरमुकाम मन्थलीमा प्रवक्ता रुवालीले अबको निर्वाचनमा नेपाली कांग्रेसले देशभर र विशेषगरी रामेछापमा ऐतिहासिक विजय हासिल गर्ने दाबी गरे । उनले कम्युनिष्ट घटकहरूले जनतालाई बाँडेको सपना केवल सत्तामा पुग्ने भ¥याङ मात्र भएको र उनीहरूको ढोंग अब जनतामाझ उदाङ्गो भइसकेको टिप्पणी गरे ।
प्रवक्ता रुवालीले सम्बोधनका क्रममा रामेछापको विकास निर्माणमा नेपाली कांग्रेसले खेलेको ऐतिहासिक भूमिकाको स्मरण गराउँदै बीपी कोइरालाको समाजवादी चिन्तन र वर्तमानको बदलिएको आवश्यकता अनुसार कांग्रेसले मात्र आर्थिक क्रान्तिको नेतृत्व गर्न सक्ने तर्क गरे । उनले रामेछापका गाउँ–गाउँमा सडक पु¥याउने, शिक्षा र स्वास्थ्यको पूर्वाधार खडा गर्ने र जलविद्युत परियोजनाहरूलाई राष्ट्रिय गौरवको रूपमा अगाडि बढाउने सवालमा कांग्रेसको योगदान अतुलनीय रहेको बताए । कांग्रेसले सधैँ कुराभन्दा काममा विश्वास गर्ने र जनताको सुख–दुःखमा साथ दिने पार्टी भएको हुँदा अबका मतदाताले कुनै पनि भ्रमको पछि नलागी रुख चिह्नमा मतदान गर्ने विश्वास उनले व्यक्त गरे ।
कम्युनिष्ट शक्तिहरूमाथि कडा प्रहार गर्दै प्रवक्ता रुवालीले हिजोका दिनमा गठबन्धन र सिद्धान्तका ठूला कुरा गर्नेहरू आज कुन हविगतमा छन् भन्ने कुरा स्पष्ट भएको बताए । सत्ताका लागि जस्तोसुकै अपवित्र सम्झौता गर्ने र जनताको मतको अपमान गर्ने प्रवृत्तिले मुलुकको लोकतन्त्र नै धरापमा परेको उनको आरोप थियो। उनले थपे, कम्युनिष्टहरूले कहिले नक्कली राष्ट्रवादको नाममा त कहिले समृद्धिको खोक्रो नारामा जनतालाई पटक–पटक झुक्याएका छन्, तर व्यवहारमा उनीहरूले केवल भ्रष्टाचार, नातावाद र प्रशासनिक बेथिति मात्र भित्र्याएका छन्। फागुन २१ को निर्वाचन ती अधिनायकवादी र अस्थिर सोच राख्नेहरूका लागि रामेछापका जनताले दिने गतिलो झापड हुने उनको उद्घोष थियो।
रुवालीले प्रदेशभर कांग्रेसको पक्षमा अभूतपूर्व जनलहर सिर्जना भएको र रामेछापमा पार्टीले स्पष्ट बहुमत पाउने रणनीति तयार गरिसकेको जानकारी दिए । उनले डगमगाएको राष्ट्रिय अर्थतन्त्रलाई ट्रयाकमा ल्याउन, युवा स्वरोजगारका अवसर सिर्जना गर्न र रामेछाप जस्तो कृषि र जलस्रोतको प्रचुर सम्भावना भएको जिल्लामा आधुनिक कृषि प्रणाली र पर्यटनको विकासका लागि कांग्रेसको नेतृत्व अपरिहार्य रहेको बताए ।
मन्थलीमा उपस्थित नेता तथा कार्यकर्ताहरूलाई विशेष निर्देशन दिँदै रुवालीले सामाजिक सञ्जाल र अन्य विपक्षी माध्यमबाट कांग्रेसका विरुद्ध फैलाइएका संगठित भ्रमहरूलाई गाउँ–गाउँमा पुगेर चिर्न आग्रह गरे । उनले प्रत्येक घरको ढोकामा पुगेर कांग्रेसले विगतमा गरेका जनपक्षीय कामहरूको फेहरिस्त सुनाउन र फागुन २१ लाई एउटा नयाँ युगको सुरुवातको रूपमा मनाउने गरी तयारीमा जुट्न आह्वान गरे । पार्टीभित्रका सानातिना असन्तुष्टि र मनमुटावलाई त्यागेर अहिलेको मुख्य लक्ष्य लोकतन्त्रको रक्षा र कांग्रेसको विजय बनाउनुपर्नेमा उनको जोड थियो।