यातायात व्यवस्था कार्यालय, खुर्कोटमा लाइसेन्सको ट्रायल, परीक्षा स्थगित

सिन्धुली । बागमती प्रदेश सरकार अन्तर्गतको यातायात व्यवस्था कार्यालय, खुर्कोटले नियमित रूपमा सञ्चालन गर्दै आएको सवारी चालक अनुमति पत्रको लिखित तथा प्रयोगात्मक परीक्षा अनिश्चितकालका लागि स्थगित गरेको छ । आगामी निर्वाचनको तयारीका लागि कार्यालयका कर्मचारीहरू खटिनुपर्ने भएपछि अर्को सूचना नभएसम्मका लागि परीक्षाहरू रोकिएका हुन् ।
कार्यालयद्वारा जारी सूचनाअनुसार कर्मचारीहरू निर्वाचनसम्बन्धी विभिन्न प्राविधिक तथा प्रशासनिक कार्यमा व्यस्त हुनुपर्ने भएकाले नियमित परीक्षा सञ्चालन गर्न असमर्थ भएको जनाइएको छ । निमित्त कार्यालय प्रमुख कृष्ण कुमार गुप्ताले हस्ताक्षर गरेको उक्त सूचनामा सेवाग्राहीलाई पर्न गएको असुविधाप्रति कार्यालयले क्षमायाचना समेत गरेको छ ।
लाइसेन्सको लिखित र ट्रायल परीक्षाका लागि तयारी गरिरहेका परीक्षार्थीहरू अब अर्को सूचना नआएसम्म पर्खनुपर्ने भएको छ । कार्यालयले थप जानकारीका लागि आफ्नो आधिकारिक फेसबुक पेज र वेबसाइट नियमित रूपमा हेर्न सेवाग्राहीलाई आग्रह गरेको छ ।