काँग्रेस–काँग्रेस बिच झडप, २ जना घाइते

रामेछाप । जिल्लाको खाँडादेवी गाउँपालिका वडा नं. ८ स्थित गाल्बा बजारमा शनिवार नेपाली काँग्रेसका कार्यकर्ता बिच झडप भएको छ । रामेछाप काँग्रेसका नेताहरू रामचन्द्र खड्का, भरत चौलागाँई र जीतबहादुर मगर पक्ष र वीरबहादुर तमाङ बिच झडप हुँदा २ जना घाइते भएका छन् ।
झडपमा जीतबहादुर मगर र बेनबहादुर तामाङ घाइते भएको रामेछाप काँग्रेसका पार्टी सभापति पूर्णबहादुर तामाङ (कान्छाराम) ले बताए । उनका अनुसार झडप आसनग्रहणका करण भनिए पनि पुरानो रिसिइबिका कारण भएको हो ।
नेपाली काँग्रेसको भातृ सङ्गठन आदिवासी जनजाति महासङ्घको जिल्ला अधिवेशनमा आसन ग्रहणका क्रममा विवाद हुँदा काँग्रेसका नेता जीतबहादुर मगर र बेनबहादुर मगर कुटिएका छन् । उनी सँगै केही नेतालाई कार्यकर्ताले लखेटेका छन् । महासङ्घको प्रथम जिल्ला अधिवेशन उद्घाटन सत्रमै झडप भएपछि कार्यक्रम स्थगित भएको छ ।
भागेका केही नेता हेलिकोप्टर मगाएर काठमाडौँ फर्किएका छन् भने सांसद तथा जिल्ला सभापति कान्छारामलाई प्रहरीले सुरक्षितरुपमा मन्थली ल्याएको छ । विवाद कुटपिटमा परिणत भएको र कुटपिटका कारण जितबहादुर मगर र बेनबहादुर मगर घाइते भएको रामेछापका डिएसपी प्रदीपकुमार सिंहले बताए ।
जीतबहादुर मगर २०७४ सालको निर्वाचनमा प्रदेश सभा ’ख’ सदस्यका उम्मेदवार थिए भने उनी हाल नेपाली काँग्रेस बागमती प्रदेश सदस्य हुन् । झडपको क्रममा ढुंगामुढा भएको थियो । कुटाइबाट केही नेता रक्तामत्य भएका छन् ।
घाइते भएका नेताहरूको काठमाडौँको नभिर्क अस्पतालमा उपचार भई रहेको स्रोतले बताएको छ ।