रामेछापको विकास र जनजीवनका सवाललाई केन्द्रमा पु¥याउने प्रतिबद्धता

रामेछाप । नेपाली कम्युनिस्ट पार्टीका तर्फबाट प्रतिनिधिसभा सदस्यका उम्मेदवार श्यामकुमार श्रेष्ठ (कुशल) ले रामेछापको विकास र जनजीवनका सवाललाई केन्द्रको निर्णय प्रक्रियासम्म प्रभावकारी रूपमा पु¥याउने प्रतिबद्धता व्यक्त गरेका छन्। सोमवार मन्थलीमा आयोजित पत्रकार सम्मेलनमा उनले लामो समयदेखि राज्यको प्राथमिकताबाट ओझेलमा परेको रामेछाप अब परिणाममुखी राजनीतिक हस्तक्षेपको खोजीमा रहेको बताए।
श्रेष्ठले विगतका निर्वाचनमा गरिएका वाचा र प्रतिबद्धता कार्यान्वयन हुन नसक्दा जनतामा निराशा बढेको उल्लेख गरे। “राजनीति भाषण र नारामा सीमित हुँदा जनता थाकिसकेका छन्,” उनले भने, “अब आवश्यक छ–काम गरेर देखाउने प्रतिनिधि।” उनका अनुसार प्रतिनिधिसभा सदस्यको भूमिका केवल संसद्मा उपस्थिति जनाउने नभई नीति निर्माणदेखि बजेट कार्यान्वयनसम्म सक्रिय हस्तक्षेप गर्ने हुनुपर्छ।
उनले रामेछापका ग्रामीण बस्तीमा अझै पनि आधारभूत पूर्वाधारको अभाव रहेको उल्लेख गर्दै सडक, खानेपानी, सिँचाइ र विद्युत् जस्ता विषयलाई पहिलो प्राथमिकतामा राख्नुपर्ने बताए। संघीय संरचना आएपछि पनि यसको वास्तविक लाभ गाउँसम्म पुग्न नसकेको उनको भनाइ थियो। योजनाहरू कागजमै सीमित हुँदा स्थानीय बासिन्दाले परिवर्तनको अनुभूति गर्न नसकेको उनले बताए।
पत्रकार सम्मेलनमा श्रेष्ठले शिक्षा र स्वास्थ्य क्षेत्रको अवस्थाप्रति पनि गम्भीर चासो व्यक्त गरे। सामान्य उपचारका लागि समेत जिल्लाबाहिर जानुपर्ने बाध्यता अझै अन्त्य हुन नसकेको उल्लेख गर्दै उनले यसलाई राज्यको असफलताको संज्ञा दिए। “शिक्षा र स्वास्थ्य नागरिकको मौलिक अधिकार हो,” उनले भने, “यसमा पहुँच र गुणस्तर दुवै सुनिश्चित हुनुपर्छ।” प्रतिनिधिसभामा पुगेपछि यी क्षेत्रका लागि पर्याप्त बजेट र नीति सुधारका लागि पहल गर्ने उनको प्रतिबद्धता थियो।
रामेछापबाट ठूलो संख्यामा युवा वैदेशिक रोजगारीमा जान बाध्य भएको प्रसंग उठाउँदै श्रेष्ठले जिल्लामै रोजगारी सिर्जना गर्न सकिने सम्भावना प्रशस्त रहेको बताए। कृषि, पर्यटन र साना उद्योगलाई व्यवस्थित रूपमा अघि बढाउन सके युवालाई गाउँमै रोक्न सकिने उनको भनाइ छ। उनले परम्परागत कृषिपद्धतिमा सीमित रहँदा किसान समस्यामा परेको उल्लेख गर्दै आधुनिक प्रविधि, सिंचाइ र बजारको सुनिश्चितता आवश्यक रहेको बताए।
श्रेष्ठले राजनीति र जनताको सम्बन्ध कमजोर बन्दै गएको स्वीकार गर्दै त्यसको प्रमुख कारण सुशासनको अभाव रहेको दाबी गरे। भ्रष्टाचार, ढिलासुस्ती र पहुँचका आधारमा हुने निर्णयले आम नागरिकमा वितृष्णा बढाएको उनको भनाइ थियो। “राजनीति सेवा हो भन्ने मान्यतालाई व्यवहारमा उतार्न सकिएन भने परिवर्तन सम्भव हुँदैन,” उनले भने। आफू निर्वाचित भएमा पारदर्शी र जवाफदेही कार्यशैली अपनाउने उनले बताए।
नेपाली कम्युनिस्ट पार्टीका उम्मेदवार श्रेष्ठ लामो समयदेखि वामपन्थी राजनीतिमा सक्रिय छन्। पार्टी संगठन, जनआन्दोलन र स्थानीय तहका गतिविधिमा संलग्न हुँदै आएका उनले आफूले जनताका समस्या नजिकबाट बुझेको दाबी गरे। राजनीतिलाई पेशा नभई जिम्मेवारीका रूपमा लिएको उल्लेख गर्दै उनले जनतासँग नियमित संवाद गर्ने बताए।
पत्रकार सम्मेलनमा उनले यो निर्वाचनलाई व्यक्ति केन्द्रित नभई नीति, विचार र कार्यदिशाको प्रतिस्पर्धाका रूपमा लिन आग्रह गरे। विगतका प्रतिनिधिहरूले रामेछापका मुद्दा केन्द्रमा प्रभावकारी रूपमा उठाउन नसकेको आरोप लगाउँदै उनले अब विकल्प खोज्ने समय आएको दाबी गरे। “रामेछापको आवाज कमजोर हुनुको कारण यहाँका प्रतिनिधि कमजोर हुनु हो,” उनले भने।
रामेछाप प्रतिनिधिसभा क्षेत्रको निर्वाचन यसपटक प्रतिस्पर्धात्मक हुने देखिएको छ। विभिन्न दलका उम्मेदवारहरूले विकास र परिवर्तनका प्रतिबद्धता जनाइरहेका बेला श्रेष्ठले उठाएका सुशासन, रोजगारी र पूर्वाधार विकासका मुद्दाले मतदातालाई कति आकर्षित गर्छन् भन्ने प्रश्न खुला छ। तर, मन्थलीमा आयोजित पत्रकार सम्मेलनमार्फत उनले आफूलाई स्पष्ट एजेन्डासहित प्रस्तुत गर्ने प्रयास गरेका छन्।
सम्मेलनको अन्त्यमा श्रेष्ठले रामेछापको समग्र विकासका लागि आफूलाई प्रतिनिधिसभामा पठाउन मतदातासँग आग्रह गरे। “म बोल्न होइन, काम गर्न उम्मेदवार बनेको हुँ,” भन्दै उनले रामेछापको मुद्दा केन्द्रसम्म पु¥याउने प्रतिबद्धता दोहो¥याए।