काठमाडौँमै सामाजिक सुरक्षा भत्ता नवीकरणः १३५ जनाभन्दा बढी लाभान्वित

काठमाडौँ । रामेछापको दोरम्बा शैलुङ गाउँपालिका वडा नं. ६ रिष्ठेले काठमाडौँ क्षेत्रमा बसोबास गर्दै आएका ज्येष्ठ नागरिक तथा सामाजिक सुरक्षा भत्ता पाउने सेवाग्राहीहरूलाई लक्षित गरी शुक्रबार देखि काठमाडौँमा सञ्चालन गरिएको ५ दिने घुम्ती शिविर सम्पन्न भएको छ । नयाँ बानेश्वरस्थित नीलबाराही बहुउद्देश्यीय सहकारी संस्थाको प्राङ्गणमा सञ्चालित शिविरमार्फत १३५ जनाभन्दा बढी लाभान्वित भएका हुन् ।
वडा कार्यालयसम्म पुग्न नसक्ने अशक्त, वृद्धवृद्धा र टाढा रहेका नागरिकलाई काठमाडौँमै पुगेर सेवा दिने उद्देश्यले वडा कार्यालयले यो घुम्ती सेवा आयोजना गरेको हो । शिविरमा १३५ जनाको सामाजिक सुरक्षा भत्ता नवीकरण गरिएको छ भने अन्य करिब ५० जना सेवाग्राहीलाई वडाबाट प्रवाह हुने नागरिकता सिफारिस, व्यक्तिगत घटना दर्तालगायतका अन्य प्रशासनिक सेवा प्रदान गरिएको वडा अध्यक्ष टिका प्रसाद गौतमले जानकारी दिएका छन् ।
शिविर सम्पन्न भएसँगै अब घुम्ती सेवा बन्द भई नियमित सेवा पुनः वडा कार्यालयबाटै सुचारु हुने बताइएको छ । काठमाडौँमा रहेर सामाजिक सुरक्षा नवीकरण गर्न पाउँदा गाउँ धाउनुपर्ने झन्झट छुटेको भन्दै सेवाग्राहीले खुसी व्यक्त गरेका छन् ।
वडा कार्यालयले शिविर सञ्चालनका लागि स्थान र प्राविधिक सहयोग उपलब्ध गराउने नीलबाराही सहकारी संस्थाका सञ्चालक समितिलाई धन्यवाद ज्ञापन गरेको छ । साथै, शिविर सम्पन्न गर्न विशेष योगदान पु¥याउने समाजसेवीहरू रत्न गौतम, टङ्क चौलागाईँ, होमराज गौतम, अरुण चौलागाईँ, सन्तोष गौतम, कोमलप्रसाद ढुङ्गेल, यशु चौलागाईँ, सुरेश गौतम, सुरेन्द्र सुवेदी र ज्ञानबहादुर मगरलगायत सम्पूर्ण सहयोगीहरूप्रति वडा तथा वडा अध्यक्षले कृतज्ञता व्यक्त गर्दै आगामी दिनमा पनि यस्तै सहकार्यको अपेक्षा राखेका छन् ।