रामेछाप । तिलगंगा सर्जिकल सामुदायिक आँखा केन्द्र, रामेछापको भवन उद्घाटन भएको छ । तामाकोसी सेवा समिति परिसरमा निर्माणाधिन भवन भिजन हिमालय फाउण्डेसन, स्विजरल्याण्ड र तिलगंगा सर्जिकल सामुदायिक आँखा केन्द्र रामेछापको संयुक्त लगानीमा निर्माण गरिएको हो ।
अब तिलगंगा सर्जिकल सामुदायिक आँखा केन्द्र रामेछापकोे सबै सेवाहरु नयाँ भवनबाट सुचारु हुनेछ । तिलगंगा आँखा प्रतिष्ठान काठमाण्डौँ र तामाकोशी सेवा समितिको सहकार्य र क्योर ब्लाईन्डनेस प्रोजेक्टको सहयोगमा तिलगंगा सर्जिकल सामुदायिक आँखा केन्द्र रामेछाप संचालनमा रहेको छ । करिब डेढ करोडमा बनेको भवनको ५५ प्रतिशत भिजन हिमालय फाउण्डेसनको र बाकीँ लगानी तिलगंगा सर्जिकल सामुदायिक आँखा केन्द्रका अध्यक्ष डा. सुमन कर्माचार्यले जानकारी दिए ।
नवनिर्मित दुई तले भवनको उद्घाटन (आज) बिहिबार भिजन हिमालय फाउण्डेसन, स्विजरल्याण्डका उपाध्यक्ष डा. रोमन ग्रेम्जरले गरे । उद्घाटन अघि आयोजित पत्रकार सम्मेलनमा ग्रेम्जर सन् १९९६ मा पहिलोपटक नेपाल आएको स्मरण गर्दै त्यस यता तिलगंगा आँखा प्रतिष्ठानसँग सहकार्यमा विभिन्न स्थानमा आँखा उपचार शिविर सञ्चालन गर्दै आएको बताए । ग्रेम्जरले फाउण्डेसनले नेपालको दुर्गम क्षेत्रका समुदायमा आँखा स्वास्थ्य सेवा पु¥याउने लक्ष्यका साथ निरन्तर सहयोग गरिरहेको जानकारी दिएका थिए ।
तिलगंगा आँखा प्रतिष्ठानका बाह्य कार्यक्रम संयोजक डा. मोहनकृष्ण श्रेष्ठले रामेछापमा तामाकोसी सेवा समितिसँगको साझेदारीमा २४ वर्षदेखि आँखा उपचार सेवा प्रदान गर्दै आएको जानकारी दिए । श्रेष्ठले २४ वर्षको अवधिमा रामेछापमा मात्र एक लाखभन्दा बढी बिरामीले तिलगंगा प्रतिष्ठानको सेवाबाट लाभान्वित भएको जानकारी दिए । डा. श्रेष्ठका अनुसार काठमाडौं बाहिर नुवाकोट र धादिङपछि रामेछापमा बनेको यो तेस्रो स्थायी आँखा सर्जिकल भवनको माथिल्लो तला बाट शल्यक्रिया सेवा मात्र दिने छ ।
श्रेष्ठका अनुसार तिलगंगा आखा प्रतिष्ठान केन्दको शाखा २६ वटा आखा उपचार केन्द्र छन् जसमा १४ सर्जिकल सामुदायीक आखा उपचार केन्द्र (शल्यक्रिया समेतको सेवा) र १२ वटा सामुदायिक आखा केन्द्र (सामान्य उपचार) संचालनमा रहेका छन् ।
प्रतिष्ठानले आँखा स्वास्थ्यका क्षेत्रगत कार्यक्रम अन्तर्गत दृष्टिविहीनता निवारण, आँखाको रोग पहिचान, शल्यक्रिया, प्रशिक्षण, समुदायस्तरको जनचेतना, अनुसन्धान र सामाजिक साझेदारी लगायतका मुख्य ६ वटा कार्यक्रम सञ्चालन गरिरहेको छ ।
नयाँ भवनले जिल्लामा गुणस्तरीय आँखा स्वास्थ्य सेवा सहज रूपमा उपलब्ध गराउने छ । आँखा केन्द संचालनमा आएदेखी रामेछाप लगायत छिमेकी जिल्लाहरुका बिरामीले सहज रुपमा सेवा पाउँदै आएका छन ।
