फागुन २१ गते हुने प्रतिनिधिसभा सदस्य निर्वाचनका लागि आज आउँदै मतपत्र
रामेछाप । आगामी फागुन २१ गते हुने प्रतिनिधिसभा सदस्य निर्वाचनका लागि जिल्ला निर्वाचन कार्यालय रामेछापले आफ्नो तयारीलाई अन्तिम चरणमा पु¥याएको छ । निर्वाचनको मिति नजिकिँदै जाँदा आवश्यक पर्ने महत्वपूर्ण सामग्री मतपत्र सोमबार साँझसम्म जिल्ला आइपुग्ने भएको छ । जिल्ला निर्वाचन अधिकृत नारायण लामिछानेका अनुसार निर्वाचन आयोगबाट प्राप्त हुने १४ थरी र कार्यालय आफैँले व्यवस्थापन गर्ने ३७ थरी सामग्रीमध्ये मतपत्र बाहेकका अधिकांश सामग्री यसअघि नै जुटिसकेका छन् । आइतबार सदरमुकाम मन्थलीमा आयोजित सञ्चारकर्मीसँगको अन्तरक्रियामा उनले मतपत्र प्राप्त भएसँगै सुरक्षा घेराभित्र भण्डारण गरी मतदान केन्द्र पठाउने तयारी भइरहेको जानकारी दिए ।
निर्वाचनलाई व्यवस्थित र धाँधलीरहित बनाउन जनशक्ति व्यवस्थापनको काम पनि समानान्तर रूपमा अघि बढाइएको छ । जिल्लाभरका मतदान केन्द्रमा कुल १ हजार ३७४ जना कर्मचारी परिचालन गरिने लक्ष्य राखिएको छ । यसका लागि २३० मतदान अधिकृत, २३० सहायक मतदान अधिकृत, ६८४ सहायक कर्मचारी र १३० सहयोगी कर्मचारी आवश्यक पर्नेछन् । कार्यालयले कर्मचारीका साथै जिल्लाका शिक्षकहरू समेत समेटेर २ हजार ७४ जनाको प्रारम्भिक विवरण मुख्य निर्वाचन अधिकृतलाई उपलब्ध गराइसकेको छ । तीमध्येबाट अन्तिम छनोट गरी नियुक्तिको प्रक्रिया अगाडि बढाइने र छनोट भएका कर्मचारीलाई फागुन १२ देखि १४ गतेसम्म मन्थली माध्यमिक विद्यालयमा विशेष प्रशिक्षण दिने कार्यतालिका तय गरिएको छ ।
यसपटकको निर्वाचनमा समानुपातिक प्रणालीतर्फ आफ्नो मताधिकार प्रयोग गर्न पाउने गरी अस्थायी मतदान केन्द्रको व्यवस्थापनमा पनि विशेष ध्यान दिइएको छ । जिल्लाभर कुल २ हजार ४२२ जना अस्थायी मतदाता सूचीकृत भएका छन्, जसमा ३९ जना कारागारका कैदीबन्दी समेत समावेश छन् । उनीहरूका लागि जिल्ला कारागार र सघन सहरी तथा भवन निर्माण कार्यालयमा गरी दुईवटा छुट्टै मतदान केन्द्र निर्धारण गरिएको छ । यस्तै, निर्वाचनमा हुने खर्चलाई पारदर्शी र व्यवस्थित बनाउन आयोगले उम्मेदवारहरूका लागि अनिवार्य बैंक खाता खोल्नुपर्ने नियम लगाएको छ । रामेछापमा चुनावी प्रतिस्पर्धामा रहेका १७ उम्मेदवारमध्ये आइतबारसम्म ११ जनाले बैंक खाता खोल्न सिफारिस कार्यालयबाट लगिसकेका छन् ।
जिल्लाको समग्र भूगोललाई समेट्ने गरी यसपटक ९६ वटा मतदान स्थल र २२८ वटा मतदान केन्द्रहरू तोकिएका छन् । १ लाख ८७ हजार ९५२ जना मतदाता रहेको यस जिल्लामा निर्वाचनलाई स्वच्छ र निष्पक्ष बनाउन सुरक्षा निकाय र अन्य सरोकारवालासँगको समन्वयलाई तीव्र बनाइएको छ । मतदानपश्चात् संकलन गरिने मतपेटिकाहरूलाई विगतका निर्वाचनमा झैँ मन्थलीस्थित मालपोत कार्यालयमा राखेर मतगणना गर्ने व्यवस्था मिलाइएको छ । निर्वाचन अधिकृत लामिछानेले मतदाता शिक्षाका लागि स्वयंसेवक र विभिन्न समितिमार्फत सचेतनामूलक कार्यक्रमहरू गाउँगाउँसम्म पु¥याइएको दाबी गरे । सुरक्षा संवेदनशीलतालाई मध्यनजर गर्दै जिल्ला प्रशासन र सुरक्षा संयन्त्रले पनि आफ्नो गस्ती र निगरानी बढाएका छन् ।