रामचन्द्रलाई जिताउन आफू जुनसुकै मूल्य चुकाउन तयार : कान्छाराम

रामेछाप । नेपाली कांग्रेसका जिल्ला सभापति एवं पूर्व ऊर्जा, जलस्रोत तथा सिँचाइ राज्यमन्त्री पूर्णबहादुर तामाङ ‘कान्छाराम’ ले आगामी निर्वाचनमा पार्टीका उम्मेदवार रामचन्द्र खड्कालाई जिताउन आफू जुनसुकै मूल्य चुकाउन तयार रहेको बताएका छन्। कांग्रेसको घरदैलो अभियानका क्रममा कार्यकर्ता र मतदातालाई सम्बोधन गर्दै सभापति तामाङले खड्काको विजय आफ्नो प्रतिष्ठा र जीवनसँग जोडिएको भन्दै निकै अभिव्यक्ति दिएका हुन्।
चुनावी अभियानको सिलसिलामा आयोजित सभामा बोल्दै कान्छारामले भने, “रामचन्द्र खड्काजस्तो स्वच्छ छवि र निष्ठावान् नेतालाई यो निर्वाचनमा मद्दत गर्नु पर्छ र उहाँलाई जिताउन पर्छ।“
सभापति कान्छारामले रामचन्द्र खड्कालाई पार्टीको मात्र नभई सिङ्गो जिल्लाकै सम्पत्तिका रूपमा चित्रण गरे। उनले खड्काको राजनीतिक जीवनमा कुनै पनि भ्रष्टाचार वा अनैतिक कार्यको दाग नलागेको चर्चा गर्दै यस्तो इमानदार पात्रलाई संसद्मा पु¥याउनु रामेछापेली जनताको दायित्व भएको बताए।
“हामीले सधैँ खराब नेता भयो भनेर गुनासो गर्यौँ, तर अहिले कांग्रेसले सबैभन्दा योग्य र निष्कलंक व्यक्तिलाई अघि सारेको छ। यस्तो बेला पनि हामीले उहाँलाई सहयोग गरेनौँ भने राजनीतिमा इमानदारीको अर्थ रहँदैन। म उहाँको विजयका लागि आफ्नो ज्यानको बाजी लगाउन तयार छु।“ पार्टीभित्र कहिलेकाहीँ देखिने आन्तरिक मतभेदलाई लक्षित गर्दै कान्छारामले यस पटक कुनै पनि बहानामा अन्तर्घात स्वीकार्य नहुने चेतावनी दिए। उनले आफू जिल्ला सभापतिको नाताले सबैलाई एकताबद्ध बनाएर लैजान प्रतिबद्ध रहेको र रामचन्द्र खड्कालाई जिताउनु नै आफ्नो मुख्य मिसन रहेको स्पष्ट पारे।