माझी जातिको उत्थानका लागी मझेसाबा पुनर्गठन हुदैं

रामेछाप । माझी जातिको उत्थानका लागी मझेसाबा पुनर्गठन गरिएको छ । मझेसाबालाई हालको युवा पुस्ताले क्रियाशील बनाउँदै माझी जातिको उत्थान र सशक्तीकरणमा सहयोग पुगोस् भन्ने उद्देश्यले मझेसाबा पुनर्गठन गरिएको हो । यस अघि मौखिक रूपमा नै मझेसाबा चल्दै आएको थियो ।
माझी समुदायको बाहुल्यता रहेको जिल्लाका रामेछाप नगरपालिका, मन्थली नगरपालिका र खाँडादेवी गाउँपालिकाका विभिन्न स्थानमा मझेसाबाको पुनर्गठन गरिएको छ ।
गत माघ २० गते आदिवासी जनजाति महासंघ जिल्ला संयोजक श्रीबहादुर माझीको अध्यक्षतामा बसेको बैठकले समिति गठन गरी क्रियाशील बनाउने निर्णय गरेको थियो । सोही अनुसार फागुन १ गतेदेखि फागुन ८ गते सम्ममा जिल्लाको माझी समुदायको बाहुल्यता रहेको सबै जसो स्थानमा समिति गठन गरिएको हो ।
रामेछाप नगरपालिकाको वडा नं ९ राताटार र हर्देनी, मन्थली नगरपालिका वडा नं ६ सेलेघाट लगायतका स्थानमा समितिको गठन गरिएको छ ।
खाँडादेवी गाउँपालिका वडा नं १ लुभुघाट, कोथबे सित्खा, डफ्खा पुछिघाटमा, खाँडादेवी वडा नं ४ को रजगाउँ र मन्थली नगरपालिका वडा नं ६ को भटौली, मुगिटार र वडारेमा, वडा नं ८ जखनीटार, गाईखुरा, वडा नं २ करमबोट र वडा नं १ मन्थलीमा पनि समितिको गठन गरिएको छ । वडा नं ६ को नवुघाट, मसानटार, हात्तिटार र कुनौरीमा पनि मझेसाबा पुनर्गठन गरिएको मझेसाबाका जिल्ला सदस्य बालकृष्ण माझीले बताए ।