जुनारको जिल्ला भनेर चिनाउन ढुङ्गाबाट चिनारी

रामेछाप । रामेछाप जिल्लालाई जुनारको जिल्ला भनेर चिनाउनका लागि विभिन्न नदीमा यत्रतत्र छरिएर रहेका ढुङ्गा सङ्कलन गरी मन्थली बजारका सरकारी कार्यालय वरिपरि उपयुक्त स्थानमा रङरोगन गरेर राखी जिल्लाको पहिचान गराउने अभियान थालिएको छ ।
रामेछाप–काठमाडौँ सृजनशील समाजले जिल्लामा रहेका सरकारी कार्यालयको मूलढोका नजिकै तथा सडकको नाला छेउमा ढुङ्गालाई रङ लगाएर जिल्लाको चिनारी गराउने अभियान थालेको हो । समाजले स्थानीय तामाकोसी र रणजोर खोलामा रहेका ढुङ्गालाई सङ्कलन गरेर जिल्ला सदरमुकामका विभिन्न कार्यालय वरिपरि राखेर जुनारको रङसँग मिल्ने रङ लगाई जिल्लाका पालिका र वडाको जुनारको रङमा पहिचान गराउने अभियान थालेको हो ।
जिल्लामा रहेको सघन सहरी कार्यालय छेउबाट सुरु भएको अभियान जिल्ला प्रशासन, हुलाक, टेलिकम घरेलु हुँदै प्रधानमन्त्री कृषि आधुनिकीकरण परियोजना र कृषि ज्ञान केन्द्रको ढोकासम्म यस्ता ढुङ्गा सिङ्गारिएर राखिएका छन् । सरकारी कार्यालयको मूलढोका नजिक ढुङ्गा राखेर जिल्लामा रहेका मन्थली र रामेछाप नगरपालिकासहित आठवटै स्थानीय तह र साबिकका ५५ वटा गाविसको नाम लेखिएको छ ।
यो अभियानले मन्थली बजारको सौन्दर्यता बढाएको र रामेछाप जिल्ला जुनारको जिल्ला हो भन्ने चिनारी दिन सदरमुकाममा झल्को दिएको स्थानीय टङ्ककुमार श्रेष्ठले बताए ।
जिल्ला सदरमुकाम आउने जोसुकै नागरिकले पनि आ–आफ्नो पालिका र वडाको नाम, जुनारको रूपमा पाउँदा गौरवान्वित हुने र बजार पनि सफा र आकर्षक देखिने भएकाले यो अभियान चलाएको रामेछाप–काठमाडौँ सृजनशील समाजका अध्यक्ष विपिन भट्टराईले बताए। प्रधानमन्त्री कृषि आधुनिकीकरण परियोजना रामेछापले जिल्लाको मन्थली रामेछाप र सुनापति गाउँपालिकालाई जुनार जोन घोषणा गरी विभिन्न कार्यक्रम गरिरहेको छ । यसरी जुनारको रङमा पालिका र साबिकका गाविस तथा वर्तमान वडाको चिनारी गराउँदा सो क्षेत्रमा काम गर्ने आफूहरू र जुनार उत्पादक किसानले समेत गौरवको अनुभूति गरेको प्रधानमन्त्री कृषि आधुनिकीकरण परियोजनाका प्रमुख थिरलाल गैरेले बताए ।
समाजले यो अभियानलगायत जिल्ला सदरमुकाम मन्थलीमा कतै सृजनशील टावर पनि निर्माण गरेको छ । सरकारी कार्यालय वरिपरि डोको डस्टविनको अभियान पनि चलाएर रचनात्मक क्रियाकलाप गर्दै आएको छ । मन्थली नगर र विभिन्न कार्यालयले वरिपरि यस प्रकारको सरसफाइ र सजावट गर्न सके सधैँ सफा र सुन्दर मन्थली देख्न सकिने स्थानीय गुञ्जबहादुर श्रेष्ठले थपे ।