रामेछापको शिव आधारभूत विद्यालयका बालबालिकाले आफ्नै खाजा खर्च कटाएर जुटाए राहत

रामेछाप । भोटेकोशी नदीमा आएको विनाशकारी बाढीका कारण विस्थापित बनेका बाढीपीडितका लागि देश–विदेशबाट सहयोग उठ्ने क्रम जारी छ । विपत्तिको यो घडीमा दुर्गम ग्रामीण भेगका बालबालिका तथा अभिभावकहरूले समेत ऐक्यबद्धता जनाउँदै स्वेच्छिक सहयोग जुटाएका छन् ।
रामेछाप जिल्लाको उत्तरी दुर्गम भेगमा अवस्थित गोकुलगङ्गा गाउँपालिका वडा नं. १ स्थित श्री शिव आधारभूत विद्यालयका विद्यार्थी र अभिभावकहरूले बाढीपीडितको मद्दतका लागि रकम संकलन गरेका हुन् । कक्षा ८ सम्म पठनपाठन हुने उक्त विद्यालयका स–साना बालबालिकाले आफ्नो दैनिक खाजा खर्च र गोजीखर्च कटाएर बाढीपीडितका लागि सहयोग हस्तान्तरण गरेका हुन् ।
विद्यालय प्रशासनका अनुसार बाढीपीडित परिवारको घाउमा थोरै भए पनि मलम लगाउन सकियोस् भन्ने उद्देश्यले विद्यार्थी र अभिभावकहरूकै स्वतःस्फूर्त पहलमा राहत कोष संकलन गरिएको हो ।
प्रतिकूल भूगोल र सीमित स्रोतसाधनका बीच अध्ययनरत सो विद्यालयका विद्यार्थीहरूबाट कूल १९ हजार ९ सय ८५ रुपैयाँ संकलन भएको छ । कलिला बालबालिकाहरूले देखाएको यो मानवीय भावनाले सिंगो विद्यालय परिवारलाई नै भावुक बनाएको छ । त्यस्तै, बालबालिकाको यो कदममा ऐक्यबद्धता जनाउँदै स्थानीय अभिभावकहरूका तर्फबाट समेत २ हजार ७ सय ५ रुपैयाँ स्वेच्छिक योगदान प्राप्त भएको छ ।
विद्यार्थी र अभिभावक दुवै पक्षबाट गरी कुल २२ हजार ६ सय ९० रुपैयाँ रकम संकलन भएको विद्यालयका प्रधानाध्यपक विपिन राज बस्नेतले जानकारी दिएका छन् ।
“आफ्नो गाउँठाउँमा आर्थिक कठिनाइ भए पनि सिन्धुपाल्चोकका बाढीपीडितको दुःख देखेर हाम्रा साना बालबालिकाहरूले आफैं अग्रसरता देखाएका हुन्,“ विद्यालयका एक शिक्षकले भने, “रकमको आकार ठूलो नभए पनि साना बालबालिका र विपन्न अभिभावकहरूले देखाएको यो सद्भाव र मानवीयता अतुलनीय छ ।“
संकलित सम्पूर्ण सहयोग रकम पारदर्शी रूपमा बाढीपीडितसमक्ष पुर्याउनका लागि सम्बन्धित निकाय वा आधिकारिक राहत कोषमा हस्तान्तरण गरिने विद्यालयले जनाएको छ । ठूला प्राकृतिक विपत्ति परेका बेला दुर्गमका बालबालिकाहरूले देखाएको यो सहयोगी हातले समाजमा भ्रातृत्व र सामाजिक उत्तरदायित्वको उत्कृष्ट सन्देश प्रवाह गरेको छ ।