बृहत् रामेछाप महोत्सव ११ लाख बढी घाटामा
रामेछाप । रामेछाप उद्योग वाणिज्य संघ मन्थली ११ लाख बढी घाटामा रहेको छ । संघले गत पुष २६ देखि माघ ७ गते सम्म आयोजना गरेको बृहत् रामेछाप महोत्सव–२०८० को आम्दानी तथा खर्चको विवरण सार्वजनिक गर्दै संघले आफू घाटामा रहेको जानकारी गराएको छ ।
आम्दानी खर्चको विवरण अनुसार– महोत्सवमा कुल १५ लाख ८२ हजार ७ सय २६ रुपैयाँ आम्दानी भएको र २७ लाख ३० हजार ४ सय ३ रुपैयाँ खर्च भएको संघका कोषाध्यक्ष झनक बहादुर बुढाथोकी (उत्तम) ले बताए । महोत्सवका लागि कुल उठ्नु पर्ने लक्षित रकम रु ३४ लाख १९ हजार ५ सय ९० भए पनि हाल सम्म रु १५ लाख ८२ हजार ७ सय २६ रुपैयाँ मात्र उठेको र १८ लाख ३६ हजार ८ सय ६४ रुपैयाँ अझै उठ् बाँकी रहेको पनि उनले बताए ।
महोत्सवबाट लिएको लक्ष ८० प्रतिशत पुरा भएको संघका अध्यक्ष नवीन थापामगरले बताए । मगरले भने – महोत्सवबाट धेरै पाठ सिकाई भएको छ । पूर्व तयारी कम भएको हामीले महसुस गरेका छौँ । आगामी दिनमा यस्ता कार्यक्रमहरू गर्दा राम्रो सँग पूर्व तयारी गरेर कार्यक्रमको आयोजना गर्छौँ ।
जिल्लाको सुस्ताएको बजारलाई आर्थिक रूपबाट केही हद सम्म माथि उठाउन अपेक्षाले गरिएको महोत्सव मार्फत जिल्लाको कला संस्कृति लाई पहिचान गराउँदै विभिन्न कृषि उपजहरुको राम्रो व्यापार भएको संघका निवर्तमान अध्यक्ष एवं बृहत् रामेछाप सांस्कृतिक महोत्सव मूल समारोह समितिका संयोजक केशव प्रसाद घिमिरेले बताए ।
सञ्चार क्षेत्रले महोत्सवका बेला गरेको सहयोगको संघले स्व मूल्याङ्कन गर्नुपर्ने नेपाल पत्रकार महासंघ बागमती प्रदेशका कोषाध्यक्ष रमेश ढुंगेलले बताए । ढुंगेलले भने – महोत्सवको आम्दानी खर्च सार्वजनिक गर्न ढिला भयो । आम्दानी खर्च सार्वजनिक गर्न ढिला हुँदा समेत उठ्नु पर्ने रकम उठी नसक्नु संघ आफ्नो काम प्रति जिम्मेवार नहुनु हो ।
१८ लाख ३६ हजार ८ सय ६४ रुपैयाँ अझै उठ् बाँकी रहेको संघले बताए पनि कहाँ कहाँबाट उठ्न बाँकी छ त्यो बारे भने संघ पारदर्शी हुन चाहेन ।